Copy
30 Յունիս, 2022

ԿԵԱՆՔ, ԱԶԱՏՈՒԹԻՒՆ ԵՒ ԵՐՋԱՆԿՈՒԹԵԱՆ ՀԵՏԱՊՆԴՈՒՄԸ  

«Կը հաստատենք, որ այս ճշմարտութիւնները բացայայտ են, որ բոլոր մարդիկը կը ստեղծուին իբրեւ հաւասարներ, որ անոնք օժտուած են իրենց Արարիչին կողմէ որոշ անզիջելի իրաւունքներով, որոնց շարքին են Կեանքը, Ազատութիւնը եւ Երջանկութեան հետապնդումը»։  

ՄԻՒՌՈՆՕՐՀՆԷՔՈՎ ԿԸ ԲԱՑՈՒԻ ԿԻԼԻԿԵԱՆ ԱԹՈՌԻ ՁԵՌՆԱՐԿՆԵՐՈՒ ՇԱՐՔ ՄԸ

Ուրբաթ, Յուլիս 1ի երեկոյեան, Ն.Ս.Օ.Տ.Տ. Արամ Ա. պիտի հանդիսապետէ միւռոնօրհնէքի արարողութեան Անթիլիասի մայրավանքին մէջ։ Եօթը տարին անգամ մը տեղի ունեցող այս խորհրդալից արարողութեան պիտի մասնակցին Կիլիկիոյ Սուրբ Աթոռի բոլոր միաբանները, ինչպէս նաեւ Մայր Աթոռ Սուրբ Էջմիածնի, Երուսաղէմի եւ Կոստանդնուպոլսոյ Պատրիարքութեանց ներկայացուցիչներ, պետական անձնաւորութիւններ եւ բազմահազար ժողովուրդ։

Կարդացէք շարունակութիւնը

ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԻՒՆԸ ԿԸ ՄԱՍՆԱԿՑԻ ԿԱԹՈԼԻԿ ԵՒ ԱՐԵՒԵԼԵԱՆ ՈՒՂՂԱՓԱՌ ԵԿԵՂԵՑԻՆԵՐՈՒ ԱՍՏՈՒԱԾԱԲԱՆԱԿԱՆ ԵՐԿԽՕՍՈՒԹԵԱՆ

20-24 Յունիսին, Վատիկանի մէջ տեղի ունեցաւ Կաթոլիկ Եկեղեցւոյ եւ Արեւելեան Ուղղափառ Եկեղեցիներու միջեւ Աստուածաբանական երկխօսութեան միացեալ ժողովին 18րդ հանդիպումը: Ն.Ս.Օ.Տ.Տ. Արամ Ա. Վեհափառ Հայրապետի տնօրինումով, Մեծի Տանն Կիլիկիոյ Կաթողիկոսութիւնը այս ժողովին ներկայացուցին Գերշ. Տ. Մակար Եպս. Աշգարեան եւ Գերպ. Տ. Պօղոս Ծ. Վրդ. Թինքճեան (համաքարտուղար)։

Կարդացէք շարունակութիւնը

«Ս. ԳՐԻԳՈՐ ՏԱԹԵՒԱՑԻ» ԱՄԱՌՆԱՅԻՆ ԼՍԱՐԱՆԸ ՍԿՍԱՒ

Կիրակի, 26 Յունիս, Ազգային Առաջնորդարանի «Ս. Գրիգոր Տաթեւացի» ամառնային լսարանին բացումը տեղի ունեցաւ St. Mary of Providence կեդրոնին մէջ (Էլվըրսըն, Փէնսիլվէնիա)։ Վերջին երկու տարիներուն, դասընթացքը առցանց ներկայացուած էր՝ պսակաձեւ ժահրի համավարակին պատճառով։

Կարդացէք շարունակութիւնը

ՈՂՈՐՄՈՒԹԻՒՆ Կ՚ՈՒԶԵՄ ԵՒ Ո՛Չ ԶՈՀ
(Առաջնորդ Սրբազան Հօր քարոզը, 26 Յունիս, 2022)

Այսօր՝ Հոգեգալուստի տօնի չորրորդ Կիրակին, Աւետարանի ընթերցումը նշանակուած է Մատթէոս 12.1-8։ Աւետարանիչը կը պատմէ, թէ Շաբաթ օր մը Յիսուս Իր աշակերտներով ցորենի արտերու մէջէն կ՛անցնէր։ Անոնք անօթենալով, հասկեր կը քաղեն եւ կ՛ուտեն։ Փարիսեցիք շուտով կը քննադատեն օրինազանցումը։

Կարդացէք շարունակութիւնը

1993էն ի վեր, Հայաստանի ու Արցախի մեր ծրագիրներուն առանցքը կը կազմէ որբերու հովանաւորութիւնը Ազգ. Առաջնորդարանի «Մեծն Ներսէս» բարեգործական կազմակերպութեան միջոցով։ Որբերը կանոնաւորապէս կը թղթակցին իրենց հովանաւորին հետ։ Անոնց նամակներէն նմոյշներ կը ներկայացնենք ամէն շաբաթ, գրողներուն անունը միայն յիշելով՝ խորհրդապահական նկատումներով։

Այս շաբթուան նամակը գրած է Մխիթարը, որ կը հովանաւորուի Ճոն Տաղլեանի կողմէ։

Բարեւ, սիրելի հովանաւոր,

Ես՝ Մխիթար…, ծնուել եմ Հայաստանի Հանրապետութեան Գեղարքունիքի մարզի Արեգունի գիւղում։ Սովորել եմ Արեգունի գիւղի միջնակարգ դպրոցում մինչեւ հինգերորդ դասարան, ունեցել եմ առաջադիմութիւն, պարտաճանաչ եմ, ցանկանում եմ ձեռք բերել բաւարար գիտելիքներ։

Մեր ընտանիքում բոլորս հայրենասէր են, պապիկս եղել է կապիտան, մասնակցել է Արցախեան ազատագրական պայքարին, հայրիկս՝ Յարութիւն …, նոյնպէս ծառայում էր հայկական բանակում, ստացել է բազմաթիւ մեդալներ, բայց 2016 թուականի քառօրեայ պատերազմի ժամանակ զոհուել է եւ յետմահու արժանացել հերոսի կոչման։

Մենք ընտանիքով տեղափոխուել ենք Կոտայքի մարզի Աբովեան քաղաք։ Սովորել եմ Աբովեան քաղաքի Վիկտոր Համբարձումեանի անուան համար 16 դպրոցում։ Սովորում եմ հարուածային։ Ապագայում ցանկանում եմ սովորել ռազմական դպրոցում եւ դառնալ հայոց բանակի ապագայ զինուոր։

Շնորհակալութիւն ծրագրում ընդգրկելու համար։

ԱՐՑԱԽԱԲՆԱԿ 35 ՈՐԲԵՐ ՏԱԿԱՒԻՆ ԿԸ ՍՊԱՍԵՆ

Ազգային Առաջնորդարանի «Մեծն Ներսէս» բարեգործական կազմակերպութեան որբերու սպասման ցուցակը ներկայիս 35 հոգի ունի։ Բոլորն ալ Արցախ բնակող ու 2020ի պատերազմի նահատակներու որբեր են։ 

1993էն ի վեր, «Մեծն Ներսէս» կազմակերպութիւնը հովանաւորած է 3329 որբեր, ներառեալ այժմ հովանաւորուող 1296 որբերը, որոնք թէ՛ անչափահասներ եւ թէ՛ չափահաս ուսանողներ են։ Երախտապարտ ենք բոլոր հովանաւորներուն, որոնք տարեկան 250 տոլարի վճարումով ստանձնած են այդ պարտականութիւնը։ Այս գումարը ո՛չ միայն կը թեթեւցնէ որբին եւ իր ընտանիքին նիւթական հոգը, այլեւ կը բարձրացնէ անոնց բարոյականը։

Այստեղ սեղմեցէք մինչեւ 18 տարեկան որբերու առցանց հովանաւորութեան համար։

Այստեղ սեղմեցէք համալսարանական ուսման հետեւող չափահաս որբերու առցանց հովանաւորութեան համար։

Որբերու հովանաւորութեան ծրագրին մասնակցելու համար, Առաջնորդարան կրնաք դիմել նաեւ ելեկտրոնային նամակով (sophie@armenianprelacy.org) կամ հեռաձայնով (212-689-7810)։

ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ

ԿԻՐԱԿԻ, 3 ՅՈՒԼԻՍ
Դ. ԿԻՐԱԿԻ ՀՈԳԵԳԱԼՈՒՍՏԷՆ ԵՏՔ

ՃՇ. ԸՆԹԵՐՑՈՒՄ
Եսայի 1:21-31

ԱՒԵՏԱՐԱՆ ԸՍՏ ՄԱՏԹԷՈՍԻ 12։38-45

ՆԱՄԱԿ ՀՌՈՄԱՅԵՑԻՆԵՐՈՒՆ
7։25-8։11

 

Այս Կիրակի օրուան ընթերցումները կարդալու համար, սեղմեցէք այստեղ:

Հինգշաբթի, 30 Յունիս՝ Սուրբ Թէոդիտոս Գաղատացի եւ Թալիլեայ բժիշկ եւ եօթը կոյսերը, որոնք նահատակուեցան Անկիւրիոյ մէջ
Շաբաթ, 2 Յուլիս՝ Սուրբ Գրիգոր Լուսաւորիչի նշխարներու գիւտը
Երկուշաբթի, 4 Յուլիս՝ Ս. Անտոնինոս, Ս. Թէոփիլոս, Ս. Անիքտոս եւ Ս. Փոտինոս 
Երեքշաբթի, 5 Յուլիս՝  Սուրբ Դանիէլ մարգարէ եւ երեք երիտասարդները՝ Սեդրաք, Միսաք եւ Աբէթնագով։

Ս. ԳՐԻԳՈՐ ԼՈՒՍԱՒՈՐԻՉԻ ՆՇԽԱՐՆԵՐՈՒ ԳԻՒՏԸ

Այս Շաբաթ, 2 Յուլիսին, Հայաստանեայց Եկեղեցին կը տօնախմբէ Ս. Գրիգոր Լուսաւորիչի նշխարներու գիւտը։ Սուրբ Լուսաւորիչը՝ մեր եկեղեցւոյ հովանաւոր սուրբը, քրիստոնէութեան լոյսը սփռած է ամբողջ Հայաստանի մէջ, շինելով եկեղեցիներ, որոնց շարքին՝ Ս. Էջմիածնի Մայր Տաճարը, եւ հաստատելով առաջին կանոնագիրքը։ Գրած է բազմաթիւ աղօթքներ եւ կազմակերպած՝ եկեղեցական արարողութիւնները։

Կարդացէք շարունակութիւնը

ԴԱՆԻԷԼ ՄԱՐԳԱՐԷՆ ԵՒ ԻՐ ԸՆԿԵՐՆԵՐԸ

Երեքշաբթի, 5 Յուլիսին, Հայաստանեայց Եկեղեցին կը նշէ Դանիէլ մարգարէի ու իր ընկերներուն՝ Սեդրաքի, Միսաքի եւ Աբէթնագովի տօնը։ Գերութենէն ետք, Դանիէլն ու ընկերները արժանացած էին Բաբելոնի թագաւոր Նաբուգոդոնոսորի բարեհաճութեան։ Սակայն, անոնք մերժեցին հնազանդիլ թագաւորի հրամանին՝ իր մեծադիր արձանը աստուծոյ նման պաշտելու եւ երեքով նետուեցան խոշոր հնոցի մը մէջ։ Բոցերը դուրս եկան հնոցէն ու լափեցին շուրջը գտնուողները, մինչ երեք երիտասարդները անվնաս կը քալէին անոնց մէջ։

Կարդացէք շարունակութիւնը

«ԿԻՆ՝ ԱՏԵԱՆ ԵՒ ՄԱՏԵԱՆ»
(Վեհանոյշ Թեքեան)

Քերթողական եւ արձակ կտորներու այս հաւաքածոն Վեհանոյշ Թեքեանի վաստակին մէջ կիներու մասին խօսող արտադրութեան մէկ ճաշակն է։ Հոն կը ներկայանան այլատեսակ կիներ՝ տարբեր մշակոյթներէ, ցամաքամասերէ ու ընկերային յարաբերութեանց ժամանակաշրջաններէ։ Անոնք իրե՛նց հոգեխառնութեամբ եւ ձայնով է, որ կը դիմակայեն սովորականն ու անսովորը, տարբեր պետութիւններու օրէնքները, դատարանն ու պարտադրուող ինչ-ինչ աւանդութիւնները, մեղքերն ու սրբութիւնները։ Կը կազմեն սեփական կամքով ատեան եւ կը մատուցուին որպէս ժամանակակից մատեան։
 
«Հարկ է ընկալել գեղեցիկ բառերէն անդին ու տեսնել Թեքեանի տողերուն մէջ տեղ գտած փիլիսոփայական կայծերը, մտաւորական խորութիւնը, սփիւռքահայու, գրողի ու մարդու տագնապները պատկերելու նորարար ձեւերու առանձնայատկութիւնը, կնոջ խնդիրները գեղագիտացնելու վարպետութիւնն ու այդ խնդրի հիմնական (ու շուկայի վրայ գրեթէ մենաւոր տեղը) իր քերթողութեան եւ ստեղծագործական արձակին մէջ» (Յակոբ Կիւլլիւճեան)։

Այստեղ սեղմեցէք՝ Առաջնորդարանի գրախանութէն
օրինակ մը գնելու համար

ՅԱԿՈԲ ՄԵԼՔՈՒՄԵԱՆ (մահ՝ 3 Յուլիս, 1962)

«Նեմեսիս» գործողութեան ծիրէն դուրս, բայց միեւնոյն առաջադրանքով, հայազգի խորհրդային զինուորական Յակոբ Մելքումեան (Մելքումով) 1922 թուականի ամրան սպաննած է Հայոց Ցեղասպանութեան գլխաւոր պատասխանատուներէն Էնվէր փաշան։

Մելքումեան ծնած է Վարանդայի (Արցախ) Խերխան գիւղը, որմնադիրի ընտանիքի մէջ, 24 Դեկտեմբեր, 1885ին։ 1890ին, հօր մահէն ետք, մօր հետ փոխադրուած է Աշխապատ (Թիւրքմէնիստան)՝ հօրեղբօր քով, ուր սորված է թիւրքմեներէն եւ ձիավարժութիւն։ 1906ին, աւարտած է Աշխապատի գիմնազիոնի 6րդ դասարանը եւ բանակ զօրակոչուած յաջորդ տարին։ 1910 թուականին, Մելքումեան աւարտած է Նիկոլաեւի հեծելազօրային ուսումնարանը (Փեթերպուրկ)։

Կարդացէք շարունակութիւնը

Կ՚ԱՆՁՐԵՒԷ, ՏՂԱՍ
(Վահան Թէքէեան, 1878-1945)
 

Կ՛անձրևէ, տղա՛ս... Աշունը թաց է,
Թաց աչքերուն պէս խեղճ խաբուած սիրոյն...։
Պատուհանն ու դուռը գնա գոցէ՛
Եւ դէմըս եկուր նստիլ վեհագոյն

Լռութեան մը մէջ...։ Կ՛անձրևէ տղա՛ս...։
Կ՛անձրևէ՞ երբեմն հոգիիդ մէջ ալ,
Կը մըսի՞ սիրտըդ, և կը դողդըղա՞ս`
Խորհելով պայծառ արևին անցեալ,

Դրան մը ներքև գո՜ց ճակատագրին...։
Բայց կու լաս, տղա'ս... Մութին մէջ յանկարծ
Ծանր արցունքներ աչքէդ կը գլորին...։

Լա՛ց անմեղութեան արցունքը անդարձ,
Լա՛ց չգիտնալով, խեղճ, անգէ՛տ տղաս,
Խե՜ղճ որսը կեանքին, ա՜հ, լա՛ց, որ մեծնաս...։

ՏԱՐԲԵՐ ՄԱՇՏՈՑ ՄԸ 

Բոլորս ալ գիտենք, որ Սուրբ Մեսրոպ Մաշտոց հայոց գիրերը գիւտը կատարած է եւ գաղափար ունինք, թէ ի՞նչ աշխատանք կատարած է, ի՞նչ ջանքեր թափած է հայ դպրութեան ստեղծումին համար։

«Մաշտոց» անունի իմաստին ու ծագումին մասին գիտնականները համաձայնութեան չեն եկած մինչեւ հիմա։ Ինչպէս յայտնի է, Մեսրոպ Մաշտոցի աշակերտ ու կենսագիր Կորիւնը զինք միշտ Մաշտոց կոչած է իր «Վարք Մաշտոցի»ին մէջ, իսկ Մեսրոպը աւելի ուշ աղբիւրներու մէջ երեւան եկած է։

Կարդացէք շարունակութիւնը

ՁԵՐ ՆԱՄԱԿՆԵՐՈՒՆ ՈՒ ԼՐԱՏՈՒՈՒԹԻՒՆՆԵՐՈՒՆ ԿԸ ՍՊԱՍԵՆՔ 
Սիրով կ՚ընդունինք ձեր նամակները, ինչպէս եւ ծխական ու դպրոցական կեանքի մասին ձեր թղթակցութիւնները՝ հայերէնով կամ անգլերէնով։ Նամակները պէտք է ուղղուին խմբագրութեան եւ յիշեն գրողի բնակած քաղաքն ու նահանգը, իսկ Ամերիկայէն դուրս գրուած ըլլալու պարագային՝ նաեւ երկիրը։ Անհրաժեշտ է նիւթերը ուղարկել մինչեւ Երեքշաբթի երեկոյ։  
Մեր հասցէն՝ crossroads@armenianprelacy.org.

ԺԱՄԱՆԱԿԱՑՈՅՑ

7 Օգոստոս— Ս. Վարդանանց եկեղեցւոյ (Փրաւիտընս, Ռոտ Այլընտ) տարեկան դաշտագնացութիւն եւ խաղողօրհնէք։ 
7 Օգոստոս— Ս. Ստեփանոս եկեղեցւոյ (Ուոթըրթաուն, Մէսէչուսէթս) տարեկան դաշտագնացութիւն եւ խաղողօրհնէք։ 
21 Օգոստոս— Ս. Աստուածածին եկեղեցւոյ (Ուայթընզվիլ, Մէսէչուսէթս) տարեկան դաշտագնացութիւն եւ խաղողօրհնէք։ 
25 Սեպտեմբեր—  Տօն անուանակոչութեան Սուրբ Խաչ եկեղեցւոյ (Թրոյ, Նիւ Եորք)։ 
2 Հոկտեմբեր—  Տարեկան տօնախմբութիւն Ս. Գրիգոր եկեղեցւոյ (Նորթ Անտովըր, Մէսէչուսէթս)։ 
16 Հոկտեմբեր—  Տարեկան տօնախմբութիւն եւ սարկաւագի ձեռնադրութիւն Ս. Սարգիս եկեղեցւոյ մէջ (Տիրպըրն, Միշիկըն)։ 
23 Հոկտեմբեր—  Տարեկան տօնախմբութիւն Ս. Յակոբ եկեղեցւոյ (Ռէյսին, Իլինոյ)։ 
23 Հոկտեմբեր— Ս. Աստուածածին եկեղեցւոյ (Ուայթընզվիլ, Մէսէչուսէթս) 65ամեակի տօնակատարութիւն։
13 Նոյեմբեր— Տարեկան տօնախմբութիւն Ս. Խաչ եկեղեցւոյ (Ուաշինկթըն)։ 
20 Նոյեմբեր— Գոհաբանութեան տօնի տարեկան ճաշկերոյթ, նուիրուած՝ Ազգային Առաջնորդարանի 65ամեակին։ 
6 Դեկտեմբեր— Տարեկան տօնախմբութիւն Ս. Գրիգոր Լուսաւորիչ եկեղեցւոյ (Կրանիթ Սիթի, Իլինոյ)։      

Facebook
Instagram
Website
Facebook
Twitter
Link
Website
Copyright © 2022 Armenian Prelacy, All rights reserved.